ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងពីកត្តាចំនួន៦ ដែលធ្វើឱ្យប្រជាជនប្រារព្ធពិធីចូលឆ្នាំខ្មែរបានដោយរីករាយក្នុងឆ្នាំ២០២៣ នេះ។

ថ្លែងក្នុងពិធីបើកអង្គរសង្ក្រាន្តព្រឹកថ្ងៃទី១៤ ខែមេសា ឆ្នាំ២០២៣ នៅប្រាសាទបាយ័ន ខេត្តសៀមរាប សម្ដេចតេជោ ហ៊ុន សែន បានថ្លែងថាកត្តាទាំង៦ មានដូចជា សន្ដិភាព ការគ្រប់គ្រងកូវីដបានល្អ ការតភ្ជាប់ហេដ្ឋារចនាសម្ព័ន្ធបានពេញផ្ទៃប្រទេស មធ្យោបាយធ្វើដំណើរកាន់តែងាយស្រួល ពលរដ្ឋមានចំនូលគ្រប់គ្រាន់ និងការរៀបចំបានល្អរបស់រដ្ឋាភិបាល និងសហភាពសហព័ន្ធយុវជនកម្ពុជា។

សម្ដេចតេជោថ្លែងថា៖ «វាមិនមែនជាការចៃដន្យទេដែលធ្វើព្រឹត្តិការណ៍ធំមួយនេះបាន»។

ពិធីចូលឆ្នាំប្រពៃណីជាតិខ្មែរគឺជាឱកាសដែលប្រជាពលរដ្ឋខ្មែឬទូទាំងប្រទេសអបអរសាទរ និងជួបជុំក្រុមគ្រួសារ។ ក្រោមដំបូលសន្ដិភាពដែលកម្ពុជាមានបច្ចុប្បន្នបានធ្វើឱ្យពលរដ្ឋចូលរួមរៀបចំពិធីជាតិដ៏ធំនេះបានដោយសេរី និងភាពរីករាយ៕